ໝວດການພັດທະນານິໄສທີ່ດີ 

ນິໄສຄືຫຍັງ?

ຄື ການເຮັດຫຍັງຊໍ້າໆ ຈົນມັນຕິດ ເຮັດເລື້ອຍໆ ແບບນີ້ ແຕ່ເຊົ້າຮອດແລງ ແຕ່ນ້ອຍຈົນໃຫຍ່ ເຮັດເລື້ອຍໆ ຈົນຕິດ ຖ້າບໍ່ໄດ້ເຮັດອີກແລ້ວຫງຸດຫງິດບໍ່ສະບາຍໃຈ ນັ້ນແລະກາຍເປັນນິໄສແລ້ວ ຕ້ອງໃຫ້ແຈ້ງເດີ້ “ແມ່ນຫຍັງທີ່ເຮັດເລື້ອຍໆ ຈົນຕິດ ຖ້າບໍ່ຕິດກໍ່ແລ້ວໄປ” ຮູ້ໄດ້ແນວໃດວ່າຕິດ “ຖ້າບໍ່ໄດ້ເຮັດອີກຈະຫງຸດຫງິດນັ້ນຕິດແລ້ວ” ຖ້າຕິດໃນທາງບໍ່ດີໃຫ້ເຊົາເຮັດເລີຍ ເພາະມັນເປັນກຳຊົ່ວ ປິດຫົນທາງສະຫວັນ ແລະ ພຣະນິບພານ ຕິດໃນທາງບໍ່ດີຕ້ອງເຊົາໃຫ້ໄດ້ ຖ້າບໍ່ເຊົາເສຍຫາຍເປັນເລື່ອງໆ ໄປຕິດເຫຼົ້າອີກແນ່ ຕິດຢາສູບອີກ ຕິດເວົ້າຂີ້ອວດອີກຢ່າງ

 

ນິໄສເປັນຕົວກຳກັບຄວາມດີຄວາມຊົ່ວຂອງມະນຸດ

ໃຜຕັ້ງແຕ່ນ້ອຍພໍ່ແມ່ອົບຮົມນິໄສດີ ສະນັ້ນຕັ້ງແຕ່ນ້ອຍແມ່ນຫຍັງຊົ່ວໆ ຈະບໍ່ເອົາ ບໍ່ເຮັດ ໄດ້ພໍ່ດີແມ່ດີ ກຳຊົ່ວບໍ່ເຮັດກໍ່ໂຊກດີໄປ ແຕ່ຖ້າໃຜທີ່ພໍ່ແມ່ທ່ານບໍ່ຄ່ອຍມີເວລາຕ້ອງວຸ້ນກັບການທຳມາຫາກິນ ປະໃຫ້ເຮົາຢູ່ຕາມລຳພັງກັບເອື້ອຍອ້າຍ ເລີຍບໍ່ຄ່ອຍໄດ້ສອນ ເລີຍໄດ້ນິໄສບໍ່ດີຕິດມາ ໜັກເຂົ້າກໍ່ໄປເຮັດແນວບໍ່ດີເສຍຫາຍໄປອີກ

24 ສິງຫາ 2562

 

ເຮັດຊໍ້າໆໃນສິ່ງທີ່ດີງາມ

ນິໄສດີຄື ການເຮັດຊໍ້າໆ ຈົນເຄີຍຊິນໃນທາງທີ່ຖືກຕ້ອງດີງາມ ດ້ວຍຄວາມສຳລວມລະມັດລະວັງໄພທີ່ອາດຈະເກີດຂຶ້ນໄດ້ໃນພາຍຫຼັງ ຕ້ອງລະວັງເຖິງວ່າໄພຍັງມາບໍ່ຮອດ…ຄິດແລ້ວຄິດອີກຖ້າບໍ່ມີໄພນຳມາພາຍຫຼັງເຮັດເລີຍລູກເອີຍ ເຮັດຫຍັງແລ້ວບໍ່ຕ້ອງຮ້ອນໃຈພາຍຫຼັງ ສິ່ງນັ້ນດີແທ້ ແຕ່ຖ້າເຮັດຫຍັງແລ້ວຮ້ອນໃຈ ສິ່ງນັນບໍ່ດີແນ່ນອນ ພາສາພຣະທ່ານໃຊ້ຄຳວ່າ ສຳລວມ ພາສາໄທເອີ້ນວ່າ ລະມັດລະວັງ ແມ່ນຫຍັງທີ່ບໍ່ເດືອດຮ້ອນໃນພາຍຫຼັງນັ້ນເຮັດເລີຍລູກ ເຮັດຊໍ້າໆ ໄດ້ນິໄສທີ່ດີແນ່ນອນ ຄຳບູຮານຜູ້ໃຫຍ່ມັກດ່າວ່າ ເຮັດຫຍັງບໍ່ຮູ້ຈັກຄິດ ໝາຍເຖິງ ເຮັດຫຍັງແລ້ວບໍ່ຮູ້ຈັກຄິດວ່າຈະເກີດຫຍັງເປັນໄພໃນພາຍຫຼັງບໍ່?

8 ສິງຫາ 2562

 

ນິໄສເປັນເຄື່ອງກຳກັບຄວາມຮູ້ຄວາມສາມາດ

ໃຜນິໄສດີ ສຸຂະພາບ ສະອາດ ຊື່ສັດ ກໍ່ເອົາຄວາມຮູ້ຄວາມສາມາດໄປທາງສ້າງສັນ ແຕ່ໃຜນິໄສບໍ່ດີ ມັກງ່າຍ ປະໝາດ ເອົາປຽບ ກໍ່ໃຊ້ຄວາມຮູ້ຄວາມສາມາດໄປໃນທາງທຳລາຍ

 

ນິໄສເປັນທີ່ເພິ່ງອາໄສໃຫ້ເກີດຄວາມເສື່ອມ ແລະ ຄວາມຈະເລີນຂອງແຕ່ລະບຸກຄົນ

ການສຶກສາບໍ່ວ່າຈະຈົບຫຍັງມາ ພໍ່ແມ່ຈະຍິ່ງໃຫຍ່ ລວຍ ຈົນ ບໍ່ກ່ຽວ ຖ້ານິໄສດີ ຢູ່ຄອບຄົວໃດ ຢູ່ຫ້າງຮ້ານບໍລິສັດໃດກໍ່ເຮັດໃຫ້ຈະເລີນໄດ້ ຢູ່ປະເທດໃດກໍ່ຈະເລີນໄດ້ ນິໄສດີມີທິດຖິແບບນີ້ ກົງກັນຂ້າມຖ້ານິໄສບໍ່ດີ ຢູ່ບ່ອນໃດ ຄອບຄົວນັ້ນ ບໍລິສັດນັ້ນ ປະເທດນັ້ນກໍ່ມີບັນຫາຄວາມຈະເລີນຂອງບ່ອນໃດຈຶ່ງຂຶ້ນກັບນິໄສຂອງຄົນໃນບ່ອນນັ້ນ ຖ້າຢາກໃຫ້ປະເທດຊາດຈະເລີນຕ້ອງປູກຝັງນິໄສໃຫ້ດີຕັ້ງແຕ່ນ້ອຍ ຈະຢູ່ບ້ານເປັນຄາລະວາດ ຫຼື ເປັນພຣະຕ້ອງເຝິກນິໄສດີ ໃຫ້ປະເທດຊາດຈະເລີນເພາະສະນັ້ນຢາກເຫັນພຣະພຸດທະສາສະໜາຈະເລີນ ຢາກເຫັນປະເທດຊາດຈະເລີນ ສິ່ງທຳອິດຄືເຝິກແກ້ນິໄສຕົນເອງໃຫ້ດີກ່ອນ

 

 ໝວດຫຼັກໃນການຕັດສິນໃຈ ແລະ ການເຝິກໃຈ 

ຄວນ ຫຼື ບໍ່ຄວນຕັດສິນໃຈ

ມີຢູ່ມື້ໜຶ່ງ ມີພຣະພິກຂຸໄປຖາມພຣະສາລີບຸດວ່າ ຄວນ ຫຼື ບໍ່ຄວນຕັດສິນແບບໃດ ຜິດຖືກ ດີຊົ່ວພໍຮູ້ຕາມພຣະທັມວິໄນ ແຕ່ວ່າຄວນ ບໍ່ຄວນຕັດສິນແບບໃດ ພຣະສາລີບຸດໄດ້ໃຫ້ຄຳຕອບວ່າ ແມ່ນຫຍັງກໍ່ຕາມທີ່ກຳລັງຈະເຮັດນີ້ ຕ້ອງເບິ່ງໄກໆ ເບິ່ງເຖິງຜົນໄລຍະຍາວເດີ້ ມັນຈະເປັນແບບໃດ ຖ້າມີແນວໂນ້ມຈະເກີດອະກຸສົນພາຍໜ້າ ສິ່ງນັ້ນບໍ່ຄວນ ແຕ່ຖ້າມີແນວໂນ້ມວ່າພາຍໜ້າກຸສົນຈະເກີດ ສິ່ງນັ້ນຄວນ ກຳກຸສົນກັບອະກຸສົນສອງຄຳນີ້ຈະເອົາຫຍັງມາເປັນເຄື່ອງວັດ ນັ້ນກໍ່ຄື ກຸສົນລະກຳມະບົດ 10 ແລະ ອະກຸສົນລະກຳມະບົດ 10 ນີ້ເປັນມາດຕະຖານທີ່ມີໄວ້ແລ້ວ ສິ່ງເຫຼົ່ານີ້ລູກເອີຍ ເຮົາຕ້ອງໃຫ້ເຫດໃຫ້ຜົນໄດ້

1 ຕຸລາ 2562

 

ເຫັນໄດ້ ເຫັນເສຍ

ເວລາຈະເຮັດຫຍັງ ຢ່າເຫັນແຕ່ສ່ວນທີ່ຈະໄດ້ ຕ້ອງເຫັນສ່ວນທີ່ເສຍ ແລະ ໄພທີ່ຈະຕາມມານຳ ແລ້ວຄວນເຮັດຫຼືບໍ່ຄວນເຮັດຄ່ອຍໆມາຕັດສິນກັນອີກເທື່ອໜຶ່ງ ກ່ອນຄິດ ເວົ້າ ແລະ ເຮັດຈະຕ້ອງພິຈາລະນາໃຫ້ດີວ່າຈະມີຫຍັງຕາມມາໃນພາຍຫຼັງ “ເຫັນແຕ່ໄດ້ບໍ່ພໍ ຕ້ອງເຫັນຜົນເສຍທີ່ຈະຕາມມານຳ”

2 ກັນຍາ 2562

 

ເຮັດໃນສິ່ງທີ່ບໍ່ຕ້ອນຮ້ອນໃຈໃນພາຍຫຼັງ

“ຖ້າເຮັດສິງໃດແລ້ວບໍ່ຕ້ອງຮ້ອນໃຈໃນພາຍຫຼັງ ຈົງເຮັດເລີຍ ເພາະເປັນຄວາມດີ” “ຖ້າເຮັດສິ່ງໃດແລ້ວຕ້ອງຮ້ອນໃຈໃນພາຍຫຼັງ ຈົ່ງຢ່າເຮັດ ເພາະເປັນຄວາມຊົ່ວ” ຖ້າເຮັດແລ້ວບໍ່ຕ້ອງຮ້ອນໃຈ ບໍ່ຕ້ອງເດືອດຮ້ອນໄປຂຶ້ນໂຮງຂຶ້ນສານ ບໍ່ຕ້ອງລຳບາກຕາກຕຳເສຍຜູ້ເສຍຄົນ ບໍ່ຕ້ອງໄປຕົກນະຣົກໝົກໄໝ້ ເຮັດເລີຍ ເຮັດເຂົ້າໄປ

17 ຕຸລາ 2562

 

ດີ-ຊົ່ວຕັດສິນແບບໃດ

ດີ-ຊົ່ວຕັດສິນດ້ວຍອຸປະກອນວັດ ດ້ວຍເຄື່ອງຊັ່ງ ເຄື່ອງຫຍັງກໍ່ວັດບໍ່ໄດ້ ແລ້ວຕັດສິນແບບໃດ?ພຣະສັມມາສັມພຸດທະເຈົ້າໄດ້ຕັດໄວ້ວ່າ “ເຮັດກຳອັນໃດແລ້ວ ບໍ່ຕ້ອງເດືອດເນື້ອຮ້ອນໃຈໃນພາຍຫຼັງ ກຳນັ້ນເປັນກຳດີ ສ່ວນການເຮັດຫຍັງແລ້ວຕ້ອງເດືອດຮ້ອນໃຈໃນພາຍຫຼັງ ກຳນັ້ນເປັນກຳຊົ່ວ” ເພາະສະນັ້ນເວລາຈະເຮັດຫຍັງຈຶ່ງຕ້ອງຄິດໃຫ້ດີວ່າສິ່ງໃດເລື່ອງໃດຈະຕາມມາພາຍຫຼັັງຫຼືບໍ່ ຢ່າງນ້ອຍກໍຂໍໃຫ້ຄິດພິຈາລະນາເຖິງ 4 ເລື່ອງນີ້ຄື

1. ແມ່ນຫຍັງທີ່ຕາມມາສົ່ງຜົນດີຫຼືຜົນເສຍຕໍ່ສຸຂະພາບຂອງຕົວເອງຫຼືຂອງສ່ວນລວມ
2. ແມ່ນຫຍັງທີ່ຈະຕາມມາກະທົບຕໍ່ຄົນອ້ອມຂ້າງ ສັງຄົມ ຫຼື ຜິດກົດໝາຍຫຼືບໍ່
3. ແມ່ນຫຍັງທີ່ຈະຕາມມາກະທົບຕໍ່ເສດຖະກິດ ເສຍເງິນທອງຫຼືບໍ່
4. ແມ່ນຫຍັງຈະຕາມມາມັນເພີ່ມພູນກິເລສ ຫຼື ລົດກິເລສ ສ້າງນິໄສດີ ຫຼືວ່ານິໄສເສຍໃຫ້ເຮົາຫຼືກັບຄົນສ່ວນລວມ

ຢ່າງໜ້ອຍຈະເຮັດຫຍັງກໍ່ຂໍໃຫ້ພິຈາລະນາເຖິງ 4 ເລືອງນີ້ໃຫ້ດີ

13 ຕຸລາ 2562

 

ເມື່ອຕົວເຮົາເອງ ແລະ ອ້ອມຕົວເຮົາເປຶ້ອນ ໃຈຍ່ອມອອກນອກຕົວ

“ສິ່ງທີ່ບໍ່ໜ້າເຊື່ອຄື ຍິ່ງຕົວເຮົາເອງ ຫຼື ອ້ອມຕົວເຮົາເປື້ອນເທົ່າໃດ ໃຈຈະບໍ່ຍ່ອມຢູ່ກັບຕົວ ແລ່ນອອກທາງນອກໝົດ” ຕື່່ນເຊົ້າມາໃຈກຳລັງດີໆ ອາລົມກຳລັງດີໆ ໄປໄດ້ຍິນຄຳວ່າເວົ້າຫຍັງໄປບໍ່ເຂົ້າທ່າ ໃຈແລ່ນອອກໄປລຸຍກັບເຂົາ ແລ້ວໄດ້ກິ່ນຫຍັງບໍ່ເຂົ້າທ່າ ໃຈບໍ່ຢູ່ກັບຕົວ ເຫັນເຄື່ອງຂອງທີ່ເປື້ອນ ດຽວຈະອອກໄປລຸຍກັນເລີຍ ໃນທາງກົງກັນຂ້າມ ເມື່ອຕົວເຮົາ ແລະ ອ້ອມຕົວເຮົາ ແມ່ນຫຍັງ ກໍ່ສະອາດໄປໝົດ ໃຈຈະນິ້ງຂຶ້ນມາ ແລ້ວໃຈຮັກທີ່ຈະຢູ່ໃນຕົວ

7 ກັນຍາ 2561

 

 ໝວດຄວາມສະຫຼາດທາງອາລົມ 

ປ່ອຍໃຈໃຫ້ຂຸ່ນມົວ ເປັນຜົນໃຫ້ເອົາແຕ່ໃຈ

ການປ່ອຍໃຈໃຫ້ຂຸ່ນມົວດ້ວຍອາລົມຕ່າງໆ ຢູ່ເປັນປະຈຳ ຈະເຮັດໃຫ້ເປັນຄົນເອົາແຕ່ໃຈ ບໍ່ຟັງເຫດຜົນ ບໍ່ຟັງໃຜ ສົ່ງຜົນໃຫ້ກາຍເປັນຄົນຈັບຜິດ ດູໝິ່ນຄົນ ລຳອຽງ ຖືຕົນເປັນໃຫຍ່

16 ສິຫາ 2560

 

ຄົນອິດສາ ເຫັນໃຜໄດ້ດີແລ້ວທົນບໍ່ໄດ້

ຄວາມອິດສາ ຄື ອາການທີ່ພໍເຫັນຄົນອື່ນເຂົາໄດ້ດີ ບ່ພໍໃຈ ຢາກຈະເຫັນຄວາມພິນາດຂອງຄົນອື່ນ ເຫັນໃຜໄດ້ດີແລ້ວທົນບໍ່່ໄດ້ ໃນໂລກນີ້ມີຄົນແບບນີ້ຢູ່ ເພາະສະນັ້ນ ລູກເອີຍ ຕົວເຮົາເອງຢ່າໄປເປັນແບບນີ້ນະ ບໍ່ວ່າໃນເລື່ອງຫຍັງ ເຫັນເຂົາໄດ້ດີ ຢ່າໄປອິດສາເຂົາ ໃຫ້ອະນຸໂມທະນາກັບເຂົາ ແລ້ວເຮົາກໍເຝິກຝົນຕົນເອງໃຫ້ມັນຍິ່ງໆຂຶ້ນໄປ ສ້າງບຸນໃຫ້ຍິ່ງໆຂຶ້ນໄປ

3 ມັງກອນ 2561

 

ເຝິກທົນກະທົບກະທັງກັບທົນກິເລສ

ເຝິກທົນແດດທົນຝົນນັ້ນເລື່ອງນ້ອຍ ແຕ່ທີ່ຕ້ອງເຝິກໃຫ້ຫຼາຍຄື ເຝິກທົນກະທົບກະທັ້ງກັບທົນກິເລສ ອັນນີ້ຍາກຂຶ້ນມາ ຖືກດ່າແລ້ວບໍ່ຄຽດ ອັນນີ້ບໍ່ຍາກ ແຕ່ຖືກຍ້ອງແລ້ວຍິ້ມນີ້ແລະຍາກ ເພາະຖືກຍ້ອງແລ້ວຍິ້ມນີ້ແລະ ດຽວເລິງ ແລ້ວຈະເສຍຜູ້ເສຍຄົນໄປ ແລ້ວເວລາເຮັດວຽກຈະພໍ້ເງິນ ເງິນນີ້ແລະເຮັດໃຫ້ເສຍຄົນໄປ ຖ້າບໍ່ທົນກັບກິເລສ ເຮົາກໍ່ຈະພັງເພກັນບ່ອນນີ້ແລະ ທົນຄົນ ທົນກິເລສ ເປັນສິ່ງທີ່ເຮົາຈະໄດ້ຈາກການເຮັດວຽກ

7 ກຸມພາ 2562

 

ໃຈປຽບເໝືອນແຜ່ນດິນ

ກໍ່ຄືໃຈຂອງຄົນເຮົາສ່ວນໃຫຍ່ບໍ່ຄືແຜ່ນດິນ ແຕ່ຄືຂີ້ເຜີ້ງ ລົນໄຟ ມັນອ່ອນ ພຣະສັມມາສັມພຸດທະເຈົ້າໄດ້ຕັດເລື່ອງໃຈຄືກັບແຜ່ນດິນ ກັບພຣະລາຫຸນວ່າ “ແຜ່ນດິນນີ້ ໃຜເອົານ້ຳຫອມໄປຫົດມັນ ມັນດີໃຈບໍ່ ບໍ່ດີໃຈ ມັນເສີຍໆ ເອົາຂອງເໝັນໄປຫົດ ມັນທຸກໃຈບໍ່ ມັນກໍ່ເສີຍໆ ລາຫຸນ…ເຈົ້າເຮັດໃຈໃຫ້ໄດ້ແບບນີ້ແລະ ໃຜມາເຮັດຫຍັງ ເຈົ້າກໍ່ຢ່າໄປເອົາເລື່ອງເອົາລາວກັບເຂົາ ຕັ້ງໃຈປະຕິບັດທັມຂອງເຈົ້າໄປ ແລ້ວເຈົ້າຈະໝົດກິເລສໄດ້ໄວ  “ຖ້າເຮັດໃຈໃຫ້ຄືກັບແຜ່ນດິນໄດ້ແບບນີ້ ທັມມະຕ່າງໆ ທີ່ຈະງອກງາມຂຶ້ນມາໃນໃຈກໍ່ຢູ່ໃກ້ມື ແຕ່ເພາະຄົນເຮົາໃຈບໍ່ໜັກແໜ້ນ ເຂົາດ່າ ເຂົາວ່າໃຫ້ໜ້ອຍຫນຶ່ງກໍ່ເຈັບໃຈ ທັງໆທີ່ມັນກໍ່ເປັນພຽງລົມປາກມະກະທົບຫູ ພັດລົມເປົ່າແຮງໆກວ່ານັ້ນອີກ ລົມປາກເປົ່າຄ່ອຍໆ ໜ້ອຍດຽວ ອຸ໋ຍ! ເຈັບໃຈ ຖ້າແບບນີ້ກໍ່ຄົງມີເລື່ອງເຈັບຊໍ້ານ້ຳໃຈໄປຕະຫຼອດຊາດ ເພາະສະນັ້ນໃຜເຮັດໃຈໜັກແໜ້ນຄືທີ່ແຜ່ນດິນໄດ້ກໍ່ຈະເປັນຖານຮອງຮັບຄຸນນະທັມຄວາມດີຕ່າງໆ ໃຫ້ງອກງາມໃນຈິດໃຈຢ່າງສູງຍິ່ງຂຶ້ນໄປ ພາໃຫ້ໃຈສະຫງົບສຸກໄດ້ເປັນຊັ້ນທີ 4 ແລະ ຈະສົ່ງຕໍ່ໃຫ້ໃຈສະຫງົບສຸກຍິ່ງໆຂຶ້ນໄປ ຄອບຄົວໃດກໍ່ຕາມທີ່ສາມີພັນລະຍາ ຫຼື ພໍ່ແມ່ລູກຕ່າງໆກໍ່ຖືຫຼັກຮ່ວມກັນແບບນີ້ການກະທົບກະທັ່ງກັນກໍ່ຈະບໍ່ເກີດ ແລ້ວຕ່າງຄົນກໍ່ຈະມີຈິດໃຈທີ່ສູງຂຶ້ນໄປ ແລ້ວຖ້າເຮັດກັນໄດ້ແບບນີ້ທຸກຄອບຄົວໃນປະເທດໄທບັນຫາການຢ່າຮ້າງກໍ່ຈະຫລຸດລົງ

ທີ່ມາ: ໜັງສືຄອບຄົວອົບອຸ່ນໜ້າ 30-31

 

ຍຶດຫຼັກໃຫ້ໝັ້ນ ເອົາຄວາມຖືກຕ້ອງເປັນຕົວຕັ້ງ

ເວລາເຮົາຈະເຮັດຫຍັງກໍ່ຕາມ ໃນຖານະຊາວພຸດ ທຸກຢ່າງທີ່ຄິດ ທຸກສິ່ງທີ່ເຮັດ ທຸກຄຳທີ່ເວົ້າທັງໝົດນີ້ເຮົາຕ້ອງຍຶດຫຼັກວິຊາໃຫ້ໝັ້ນ ຕ້ອງຊັດເຈນຄືບໍ່ເອົາອາລົມເປັນໃຫຍ່ໃນການເຮັດວຽກ ແຕ່ຖືເອົາຄວາມຖືກຕ້ອງເປັນໃຫຍ່ ຖືກຕ້ອງຕາມຫຍັງ ຄືຖ້າເປັນເລື່ອງທາງທັມກໍ່ໃຫ້ຖືກຕ້ອງຕາມຫຼັກພຣະທັມວິໄນທີ່ພຣະສັມມາສັມພຸດທະເຈົ້າໄດ້ໃຫ້ເອົາໄວ້ ແຕ່ຖ້າເປັນເລື່ອງທາງໂລກກໍ່ຕ້ອງໃຫ້ຖືກຫຼັກວິຊາການທີ່ມີຢູ່ເອົາໄວ້ ເຮົາຈະບໍ່ໃຊ້ອາລົມກັບໃຜ ຖ້າໄປໃຊ້ອາລົມກັບໃຜຕອນໃດ ດ໋ຽວໄດ້ເກີດກະທົບກະທັ່ງເປັນເລື່ອງຂຶ້ນມາ ແລ້ວຈະເກີດເປັນຄວາມເສຍຫາຍແກ່ຕົວເຮົາ ຄອບຄົວ ແລະ ພຣະພຸດທະສາສະໜາຕາມມາ ອັນນີ້ຕ້ອງຊັດເຈນ ເອົາຫຼັກວິຊາເປັນຕົວຕັ້ງ ຢ່າເອົາອາລົມເປັນໃຫຍ່

8 ກຸມພາ 2558

 

 ໝວດ ການກ້າວໜ້າໃນໜ້າທີ່ການງານທັງຫົວໜ້າ ແລະ ລູກນ້ອງ 

ຮຽນຮູ້ຄວາມເປັນລູກນ້ອງເພື່ອເປັນຜູ້ນຳ

ກ່ອນທີ່ຈະຂຶ້ນມາເປັນຫົວໜ້າໄດ້ນັ້ນ ເຮົາຕ້ອງໃຊ້ເວລາໃນການຮຽນຮູ້ຄວາມເປັນລູກນ້ອງໃຫ້ຖ່ອງແທ້ເສຍກ່ອນ ສັ່ງສົມຄວາມຮູ້ ສັ່ງສົມປະສົບການ ສັ່ງສົມຄວາມອົດທົນ ເປັນຄວາມຮູ້ຈາກການເຮັດວຽກໜັກໂດຍບໍ່ຈົ່ມ ເມື່ອເຮົາມີຄວາມພ້ອມທຸກຢ່າງແລ້ວ ກໍ່ຈະເຮັດງານໃຫຍ່ໄດ້ສຳເລັດ ອັນເປັນລາງວັນທີ່ເກີດຈາກຄວາມພາກພຽນ ເຝິກຝົນມາຍາວນານ ໂດຍບໍ່ຫຍໍ້ທໍ້ ບໍ່ຍອມລົ້ມເລີກໄປກາງຄັນ

8 ຕຸລາ 2562

 

ງານຍາກລຳບາກ ຈະຊ່ວຍພັດທະນາຊີວິດ

ຄວາມໜັກ ຄວາມຍາກລຳບາກເປັນເຄື່ອງມືສຳລັບພິສູດຄວາມສາມາດຂອງເຮົາ ໃຜທີ່ຮັກຈະຫາຄວາມກ້າວໜ້າໃນຊີວິດ ທຸກຄັ້ງທີ່ຖືກພໍ່ແມ່ ຫຼື ຜູ້ບັງຄັບບັນຊາໃຊ້ເຮັດງານຍາກງານໜັ້ກ ຢ່າທໍ້ແທ້ບໍ່ຮັບງານ ຫຼື ຮັບແລ້ວສົ່ງຄືນເດັດຂາດ ໃຫ້ກັດແຂ້ວເຮັດໄປ ຖ້າຕິດຂັດຫຍັງໃຫ້ໄປຖາມທ່ານ ງານກໍ່ສຳເລັດລຸລ່ວງໄປໄດ້ ຄວາມຮູ້ຄວາມສາມາດ ແລະ ປະສົບການຂອງເຮົາ ກໍ່ຈະກ້າວໜ້າຍິ່ງໆຂຶ້ນໄປ

9 ຕຸລາ 2562

 

ພຣະເດດພຣະຄຸນ

ຫຼວງພໍ່ປະຕິບັດແບບນີ້ຈຶ່ງມີຫມູ່ຫຼາຍ ເພື່ອນຮ່ວມງານ ແລະ ລູກນ້ອງມັກເກງໃຈເພາະເຮົາບໍ່ໄປຊໍ້າເຕີມເຂົາ ເຮົາມີທັງພຣະເດດ ແລະ ພຣະຄຸນ ປຽບເໝືອນເປັນທັງດວງຕາເວັນແລະ ດວງຈັນ ເປັນດວງຕາເວັນຄື ໃຫ້ຄວາມຄຸ້ມຄອງແກ່ເຂົາໄດ້ ສິ່ງໃດທີ່ຈະເປັນອັນຕະລາຍ ເຮົາປ້ອງກັນໄພນັ້ນໄດ້ ເປັນທີ່ໜ້າເກງຂາມຄື ມີພຣະເດດ ເປັນດວງຈັນຄື ໃຫ້ຄວາມອົບອຸ່ນໃຈເຂົາຂາດແຄນສິ່ງໃດ ເຊັ່ນ ອາຫານ ເສື້ອຜ້າ ເຮົາສາມາດໃຫ້ເຂົາໄດ້ເປັນທີ່ໜ້າຮັກ ຄື ມີພຣະຄຸນບຸກຄົນທີ່ເປັນທັງດວງຕາເວັນ ແລະ ດວງຈັນ ຫຼື ມີທັງພຣະເດດ ແລະ ພຣະຄຸນຈຶ່ງເປັນຜູ້ນຳໄດ້ ກົງກັນຂ້າມກັບຜູ້ທີ່ໃຊ້ອຳນາດມາຂົ່ມຂູ່ເຂົາກໍ່ຢ້ານພຽງຊົ່ວຄາວ ອຳນາດປະເພດນີ້ບໍ່ຢັ້ງຢືນ ມື້ໃດໝົດອຳນາດກໍ່ຈະມີແຕ່ຄົນສົມນ້ຳໜ້າ

31 ຕຸລາ 2562

 

ຢາກກ້າວໜ້າຕ້ອງເຂົ້າຫາຄູອາຈານ

ຖ້າໃຜຢາກໃຫ້ຄວາມຮູ້ຄວາມສາມາດກ້າວໜ້າ ຢາກຈະໃຫ້ພູມຮູ້ພູມທັມສູງຍິ່ງຂຶ້ນຈຳເປັນຕ້ອງເຂົ້າໄປຫາຄູບາອາຈານ ໄປຊັກຖາມບັນຫາ ໄປອາສາຊ່ວຍງານທ່ານ ແລ້ວກໍ່ເຮັດງານຂອງທ່ານໃຫ້ດີທີ່ສຸດ ຖ້າເຮັດໄດ້ຄົບຖ້ວນ ຄຸນນະທັມຂອງເຮົາຈະເພີ່ມຂຶ້ນທັນຕາເຫັນ

1 ພະຈິກ 2562

 

ຫົວໃຈຂອງນັກບໍລິຫານ ຢູ່ທີ່ການຕັດສິນໃຈເມື່ອພົບບັນຫາ

ຜູ້ມີຫຼັກທັມຍຶດໝັ້ນປະຈຳໃຈ ການເບິ່ງເຫັນບັນຫາ ການແກ້ບັນຫາຂອງເຂົາ ກໍ່ຈະບໍ່ໃຊ້ວິທີທີ່ສົ່ງຜົນໄປໃນທາງຊົ່ວຮ້າຍ ສົມມຸດວ່າ ເມື່ອອົງກອນເກີດພາວະຂາດທຶນ ກໍ່ບໍ່ຫາລາຍໄດ້ຊົດເຊີຍດ້ວຍວິທີການທຸຈະລິດ ຫຼືຜິດສິລທັມເຊັ່ນ ຄົດໂກງ ຫຼື ຄ້າຢາເສບຕິດເປັນການແກ້ບັນຫາ ຂະນະຄິດແກ້ບັນຫາກໍ່ມີສະຕິຄວບຄຸມບໍ່ໃຊ້ອາລົມເປັນໃຫຍ່ເຊັ່ນ ເກີດໂທສະວ່າຮ້າຍ ຫຼື ທຳຮ້າຍຜູ້ອື່ນເຊິ່ງເປັນການເພີ່ມພູນບັນຫາໃຫ້ຫຍຸ້ງຍາກຊັບຊ້ອນຍິ່ງຂຶ້ນໄປອີກ ສະນັ້ນການເປັນນັກບໍລິຫານທີ່ດີ ຈະອາໄສຄວາມເກັ່ງຢ່າງດຽວບໍ່ພໍ ຕ້ອງອາໄສຫຼັກທັມປະຈຳໃຈ ຮູ້ວ່າແມ່ນຫຍັງດີ ແມ່ນຫຍັງຊົ່ວ ແມ່ນຫຍັງຄວນເຮັດ ແມ່ນຫຍັງບໍ່ຄວນເຮັດ ການທີ່ຄົນເຮົາຈະມີປັນຍາຄິດແບບນີ້ໄດ້ ຈິດໃຈຂອງເຂົາຈະຕ້ອງຜູກຍຶດກັບຫຼັກທັມຕະຫຼອດເວລາ ຈາກໜັງສືຫຼັກທັມການບໍລິຫານຕາມພຸດທະວິທີ ໜ້າ 6

 

 ໝວດການສັດຈະຕໍ່ການກະທຳ ແລະ ຫຼັກການເວົ້າທີ່ດີ 

ຄົນມີສັດຈະ ເຮັດຫຍັງເຮັດໃຫ້ດີທີ່ສຸດ

ຄົນທີ່ມີສັດຈະນັ້ນ ເຂົາຈະມີຫຼັກງ່າຍໆ ປະຈຳໃຈຢູ່ສະເໝີວ່າ “ບໍ່ວ່າຈະເຮັດຫຍັງກໍ່ຕ້ອງເຮັດໃຫ້ດີທີ່ສຸດ ເທົ່າທີ່ຝີມືຕົວເອງມີຢູ່” ແຕ່ເຖິງຢ່າງນັ້ນກໍ່ຢ່າລືມວ່າ ຖ້າຫາກເຮົາບໍ່ປັບປຸງພັດທະນາຝີມືຢູ່ຕະຫຼອດເວລາແລ້ວ ດີທີ່ສຸດຂອງເຮົາໃນມື້ນີ້ ເມື່ອທຽບກັບເພື່ອນຝູງທີ່ເຂົາປັບປຸງຕົວເອງສະເໝີ ອາດຈະກາຍເປັນຊົ່ວທີ່ສຸດຂອງເຂົາໃນມື້ໜ້າກໍ່ໄດ້

24 ຕຸລາ 2562

 

ຄົນຂີ້ຕົວະ ເຮັດຊົ່ວໄດ້ທຸກຢ່າງ

ສັດຈະ ຄື ຄວາມຈິງຈັງຈິງໃຈ ຄວາມກົງໄປກົງມາ ຄວາມບໍ່ກັບກອກ ບໍ່ຄົດໃນຂໍ້ງໍໃນກະດູກ ສະແດງຄວາມເປັນທາດແທ້ຂອງຄົນ ແລະ ເປັນແກນຫຼັກແຫ່ງຄຸນນະທັມທັງຫຼາຍ ຄົນໃດເສຍສັດຈະກໍ່ໝົດຄົນ ເພາະແກນຫຼັກແຫ່ງຄຸນນະທັມເຊິ່ງເປັນແກນຫຼັກຂອງໃຈມັກຫັກເສຍແລ້ວ ພຣະສັມມາສັມພຸດທະເຈົ້າຕັດວ່າ “ບໍ່ມີຄວາມຊົ່ວຫຍັງໃນໂລກນີ້ ທີ່ຄົນຕົວະທັງໆທີ່ຮູ້ຈະເຮັດບໍ່ໄດ້” ເວົ້າງ່າຍໆ ຄົນໃດທີ່ຍັງຕົວະທັງໆຄົນໆນັ້ນໝົດດີ ເປັນຄົນຊົ່ວແທ້ໆເລີຍ ແກນແຫ່ງຄຸນນະທັມຫັກສະບັ້ນໝົດແລ້ວ

26 ຕຸລາ 2562

ຢ່າຕົວະເຖິງພຽງເວົ້າຢອກຫຼິ້ນມ່ວນ

ພຣະພຸດທະອົງຕັສກັບພຣະລາຫຸນວ່າ “ລາຫຸນ ກະໂປະໝາກພ້າວທີ່ຄວ້ຳແລ້ວ ຍ່ອມບໍ່ມີນ້ຳຕິດຢູ່ເລີຍສັນໃດ ຄົນຕົວະທັ້ງໆທີ່ຮູ້ເດີລາຫຸນ ຄຸນຄວາມດີບໍ່ເຫຼືອດອກຄືກັບກະໂປະໝາກພ້າວຄວ້ຳ ບໍ່ມີນ້ຳຕິດຢູ່ສັນນັ້ນແລະ” ເພາະສະນັ້ນລາຫຸນ ຈື່ໄວ້ເດີ້ ຢ່າຕົວະເຖິງເປັນພຽງການເວົ້າຫຼິ້ນມ່ວນ” ຟັງໃຫ້ດີເດີ້ລູກ ເຖິງພຽງເວົ້າຢອກມ່ວນ ກວນໝູ່ກັນມ່ວນໆ ກໍ່ຢ່າເຮັດ ເພາະມັນມີວິບາກກຳ

27 ຕຸລາ 2562

 

ກ່ອນຈະຕົວະຄົນອື່ນ ຕ້ອງຕົວະໃຈຕົວເອງກ່ອນ

ຄົນທີ່ເວົ້າຕົວະ ກ່ອນອື່ນຕ້ອງລົ້ມຮູບຄວາມຈິງທີ່ເກີດຂຶ້ນໃນໃຈຖິ້ມເສຍ ແລ້ວສ້າງຮູບລວງຂຶ້ນມາໃໝ່ ຄືກັນທໍລະທັດ ເວລາເຄື່ອງເສຍ ຮູບໃນຈໍຈະລົ້ມ ເຖິງຍັງມີສຽງຊັດເຈນ ແຕ່ເບິ່ງຮູບບໍ່ອອກ ຄົນທີ່ຕົວະຕະຫຼອດ ຮູບໃນຈໍກໍຈະລົ້ມຕະຫຼອດ ໃນທີ່ສຸດຄວາມຈິງຄືຫຍັງກໍ່ແຍກບໍ່ອອກແລ້ວຄວາມເສຍຫາຍຕ່າງໆ ຈະຕາມມາອີກຫຼວງຫຼາຍ ທາງດ້ານສ່ວນຕົວ ແລະ ດ້ານສັງຄົມ

28 ຕຸລາ 2562

 

ການເວົ້າບໍ່ມີຂໍ້ເທັດຈິງ

ສິ່ງທີ່ສະແດງວ່າເຂົາຂາດຄວາມຈິງໃຈຕໍ່ເຮົາ

ຄືການເວົ້າບໍ່ເປັນຄວາມຈິງນັ້ນເອງ

ຈື່ໄວ້ເດີ້ລູກ ໃຜກໍ່ຕາມທີ່ຮັກເຮົາ

ຖ້າເຮົາເວົ້າບໍ່ເປັນຄວາມຈິງກັບເຂົາ ເຂົາກໍ່ຈະໝົດຮັກເຮົາ

ແລ້ວຖ້າເຂົາເວົ້າບໍ່ເປັນຄວາມຈິງກັບເຮົາ ເຮົາກໍ່ຈະໝົດຮັກເຂົາເຊັ່ນກັນ

ໃຜໆກໍ່ຕ້ອງການຄວາມຈິງໃຈນຳກັນທັງນັ້ນ

 

 ໝວດຄວາມເຄົາລົບ ແລະ ການເອົາໃຈເຂົາມາໃສ່ໃຈເຮົາ

ນ້ຳໃຈເຮັດໃຫ້ໄດ້ຮັບການຊ່ວຍເຫຼືອ

ເພາະເຮົາມີນ້ຳໃຈກັບໃຜຕໍ່ໃຜມາ ເຮັດໃຫ້ເວລາມີໃຜມາຫາເລື່ອງເຮົາກໍ່ຈະມີເພື່ອນເຂົ້າມາຊ່ວຍເຫຼືອໄວ້ ເຮັດໃຫ້ລົດລາວາສອກກັນໄປໄດ້ ບ່ອນນີ້ຈຶ່ງໄດ້ຂໍ້ຄິດວ່າ ໄປຢູ່ບ່ອນໃດ ເຮັດຫຍັງ ຢູ່ໃສກໍ່ຕາມ ຖ້າໄດ້ນຳກໍ່ດີນຳ ຖ້າບໍ່ໄດ້ນຳກໍ່ຢາກຈະດີນຳ

3 ມັງກອນ 2561

 

ໃຫ້ຢ່າງເໝາະສົມ

ການສົງເຄາະຊ່ວຍເຫຼືອໃດໆກໍ່ຕາມຕ້ອງໃຫ້ຖືກຄົນ ໃຫ້ໃນສິ່ງທີ່ເຂົາຂາດແຄນ ໃຫ້ຢ່າງເໝາະສົມ ໃຫ້ແລ້ວຜູ້ຮັບສາມາດນຳໄປພັດທະນາຕໍ່ໄດ້ ບໍ່ສູນລ້າ ເຂົ້າທຳນອງ ຖ້າໃຫ້ເຂົ້າເຂົາໄປ ກິນໄດ້ບໍ່ຈັກມື້ກໍ່ໝົດ ແຕ່ຖ້າສອນວິທີປູກເຂົ້າໃຫ້ ເຂົາກໍ່ຈະມີເຂົ້າກິນຕະຫຼອດຊີວິດ ຫຼື ເຂົາປູກເຂົ້າເປັນຢູ່ແລ້ວ ແຕ່ຂາດພັນເຂົ້າ ກໍ່ຮັບຈັດຫາພັນເຂົ້າໃກ້ເຂົາໄວໆ ແລ້ວຈະດີເອງ

30 ຕຸລາ 2562

 

ຈົ່ງໃຫ້ອະໄພເພື່ອປ່ອຍນັກໂທດໃນໃຈ

ເວລາໃຜເຮັດຫຍັງໃຫ້ເຮົາບໍ່ພໍໃຈໃນບາງເລື່ອງ ຫຼື ກະທົບກະທັ່ງກັບໃຜແລ້ວ ຜ່ານມາ 3 ປີ 5 ປີແລ້ວເຮົາກໍ່ຍັງຈື່ ຍັງບໍ່ໃຫ້ອະໄພເຂົາ ມາພໍ້ໜ້າກັນເທື່ອໃດແລ້ວອາລົມຂຸ້ນທັນທີ ນັ້ນແຫຼະຄື “ເຮົາເຮັດໃຫ້ຄົນໆນັ້ນເປັນນັກໂທດຂັງເອົາໄວ້ໃນໃຈເຮົາ” ເພາະສະນັ້ນໃນໃຈເຮົາຈຶ່ງມີນັກໂທດຮົກໆຢູ່ໃນນັ້ນຫຼາຍເລີຍ ແລ້ວກໍ່ເຮັດໃຫ້ຈັດລະບຽບຄວາມຄິດໄດ້ຍາກ ເມື່ອຈັດລະບຽບຄວາມຄິດໄດ້ຍາກມັນກໍ່ມາປາກົດຕອນນັ່ງສະມາທິ ດຽວຜູ້ນັ້ນຜຸດ ດຽວຜູ້ນີ້ໂຜ່ຂຶ້ນມາ ນັ້ນແຫຼະນັກໂທດທີ່ເຮົາຂັງລືມຜຸດຈຶ້ນມາ ຈື່ໄວ້ອາການນີ້

11 ເມສາ 2561

 

ເຫັນຄຸນຍາຍບ້ວນນ້ຳລາຍ ຈຶ່ງໄດ້ຮູ້ວ່າພໍ້ຄູແລ້ວ

ຫຼວງພໍ່ໍຊອກຫາຄູອາຈານມາຫຼາຍ ມາພໍ້ຄຸນຍາຍອາຈານຂອງເຮົາບ້ວນນ້ຳລາຍເທົ່ານັ້ນແລະ ຫຼວງພໍ່ຮູ້ເລີຍວ່າໄດ້ພົບຄູບາອາຈານແລ້ວ ເພາະເວລາຄຸນຍາຍຈະບ້ວນນ້ຳລາຍ ຄຸນຍາຍຈະມີເຈ້ຍປະມານແຜ່ນ A4 ຕັດເປັນສີ່ສ່ວນວາງເອົາໄວ້ທາງຂ້າງຍາຍ ເວລາບ້ວນນ້ຳລາຍເທື່ອໜຶ່ງໃສ່ແຜ່ນໜຶ່ງ  ບ້ວນນ້ຳລາຍທີໃສ່ແຜ່ນ ຖາມຄຸນຍາຍວ່າໃສ່ລົງໄປເຮັດຫຍັງ ຄຸນຍາຍຕອບວ່າ ຍາຍແກ່ແລ້ວເຮົາຖິ້ມເອງບໍ່ໄດ້ຕ້ອງໃຫ້ຫຼານໆຊ່ວຍເທກະໂຖນ ເພາະສະນັ້ນຖ້າບ້ວນນ້ຳລາຍລ້າງມືຫຼື ສັ່ງນ້ຳມູກແມ່ນຫຍັງລົງໄປ ມັນລອຍຢູ່ແບບນັ້ນ ແມງມີ່ ແມງວັນມັນກໍ່ມາກວນ ຍາດໂຍມທີ່ເຂົາມາເຂົາເຫັນເຂົາກໍ່ຈະລັງກຽດ ຫຼານໆມັນຈະເອົາໄປຖອກມັນກໍ່ຈະລັງກຽດ ແຕ່ຖ້າຍາຍໃສ່ເຈ້ຍໄປແບບນີ້ ເວລາມັນໄປເທເຫັນເຈ້ຍຊຸ່ມໆ ມັນກໍ່ບໍ່ລັງກຽດ ເຖິງຫຼານຕົວເອງກໍ່ຍັງຕ້ອງຄິດຫຼາຍຂະໜາດນີ້ ນີ້ເປັນຕົວຢ່າງຂອງການເອົາໃຈໃສ່ເຮົາ ເອົາໃຈໃສ່ເຂົາ

29 ພະຈິກ 2560