ປະເພນີທອດກະຖິນ 

ການທອດກະຖິນ ເປັນປະເພນີຂອງຊາວພຸດທີ່ສືບທອດກັນມານັບຕັ້ງແຕ່ພຣະພຸທທະອົງຍັງມີພຣະຊົນຢູ່ ເຊິ່ງພຸດທະປະເພນີນີ້ມີຕໍ່ເນື່ອງມາດົນກວ່າ 2500 ປີ ຈົນຮອດປັດຈຸບັນ.

ນັບເປັນພິທີກຳທາງພຣະພຸທທະສາສະໜາທີ່ສຳຄັນຢ່າງໜຶ່ງ ເຊິ່ງມີຊ່ວງເວລາຈຳກັດພຽງປີລະ 1 ເດືອນ ຄືຫຼັງວັນອອກພັນສາ ແຮມ 1 ຄ່ຳເດືອນ 11 ເຖີງ ຂຶ້ນ 15 ຄ່ຳເດືອນ 12 ເຊິ່ງເປັນງານບຸນປະເພນີທີ່ປະຊາຊົນຊາວລາວນິຍົມເຮັດກັນຫຼາຍ ຖືວ່າມີອານິສົງໃຫຍ່ ເພາະຈະຕ້ອງເຮັດໃນເວລາຈຳກັດ ແລະ ຕ້ອງເຮັດການຈອງກະຖິນກັນກ່ອນ ເພາະ 1 ວັດຈະຮັບກະຖິນໄດ້ພຽງຄັ້ງດຽວເທົ່ານັ້ນ ຖືວ່າເປັນງານໃຫຍ່ປະຈຳປີຂອງວັດແຕ່ລະວັດ.

ບຸນໃຫຍ່ທີ່ໄດ້ຈາກການທອດກະຖິນມີອານິສົງມະຫາສານ ເພາະເປັນບຸນທີ່ເຮັດໄດ້ຍາກ ແລະ ມີຂໍ້ຈຳກັດຫຼາຍປະການ ການເຮັດບຸນທອດກະຖິນຈະເກີດຂຶ້ນໄດ້ກໍ່ຕໍ່ເມື່ອຕ້ອງມີການບັງເກີດຂຶ້ນຂອງພຣະສັມມາສັມພຸທທະເຈົ້າ ພຣະທັມ ແລະ ພຣະສົງເທົ່ານັ້ນ ໃນບາງກັບທີ່ບໍ່ມີພຣະສັມມາສັມພຸທທະເຈົ້າບັງເກີດຂຶ້ນ ໃນຍຸກນັ້ນນອກຈາກຈະໄຮ້ເຊິ່ງພຣະພຸດທະສາສະໜາແລ້ວ ຍັງເຮັດໃຫ້ທຸກຄົນໝົດໂອກາດທອດກະຖິນອີກດ້ວຍ ເພາະການເຮັດບຸນທອດກະຖິນຈະມີສະເພາະໃນພຣະພຸທທະສາສະໜາເທົ່ານັ້ນ

ປະເພນີທອດກະຖິນເປັນມະຫາທານຄັ້ງຍິ່ງໃຫຍ່ດ້ວຍເຫດວ່າ ໜຶ່ງປີຈະມີໂອກາດເຮັດໄດ້ພຽງຄັ້ງດຽວເທົ່ານັ້ນ ພຸດທະສາສະນິກກະຊົນຈຶ່ງໃຫ້ຄວາມສຳຄັນກັບການທອດກະຖິນເປັນຍ່າງຍິ່ງ ເປັນງານປະຈຳປີທີ່ທຸກຄົນຕ່າງພ້ອມໃຈກັນຈັດງານຢ່າງຍິ່ງໃຫຍ່ ແລະ ປານີດ.

 ປະຫວັດການທອດກະຖິນ 

ໃນສະໄໝພຸທທະການ ພຣະສັມມາສັມພຸທທະເຈົ້າປະທັບຢູ່ທີ່ວັດພຣະເຊຕະວັນ ເມືອງສາວັດຖີ ຕອນນັ້ນໄດ້ປະທານພຸດທານຸຍາດໃຫ້ພຣະພິກຂຸຢູ່ຈຳພັນສາແລ້ວ ຕໍ່ມາມີພຣະພິກຂຸຊາວເມືອງປາຖາ 30 ອົງ ຍ່າງທາງໄກມາເພື່ອເຂົ້າເຝົ້າພຣະພຸທທະອົງ ແຕ່ພໍມາຮອດເມືອງສາເກດ ເຊິ່ງຢູ່ຫ່າງຈາກເມືອງສາວັດຖີ 6 ໂຍດ ກໍພໍດີເຖິງວັນເຂົ້າພັນສາກ່ອນ ຈຶ່ງຈຳເປັນຕ້ອງເຂົ້າພັນສາທີ່ເມື່ອງສາເກດ ພໍເຖິງອອກພັນສາຈຶ່ງຟ້າວເດີນທາງໄປເຂົ້າເຝົ້າພຣະສາສະດາ ແຕ່ເພາະລະດູຝົນຍັງບໍ່ສິ້ນສຸດ ການເດີນທາງຈຶ່ງມີຄວາມຍາກລຳບາກ ຖະໜົນຫົນທາງເຕັມໄປດ້ວຍນ້ຳ ຈຶ່ງເຮັດໃຫ້ສະບົງ ຈີວອນທີ່ທ່ານນຸ່ງຫົ່ມປຽກ, ເປື້ອນເປີະ ແລະ ເປື່ອຍຂາດ ເມື່ອຮອດວັດພຣະເຊຕະວັນ ພິກຂຸທັງຫຼາຍເຫຼົ່ານັ້ນຈຶ່ງເຂົ້າເຝົ້າພຣະພຸທທະອົງໃນສະພາບການຄອງຈີວອນທີ່ເປີະເປື້ອນ ແລະ ຂາດຫ້ຽນໃນລະຫວ່າງເດີນທາງ

ພຣະບໍຣົມມະສາດສະດາແນມເຫັນແບບນັ້ນ ຈຶ່ງມີບໍຣົມພຸທທານຸຍາດໃຫ້ພິກຂຸຜູ້ຈຳພັນສາ ໄດ້ຮັບຜ້າກະຖິນທີ່ຊາວບ້ານຈັດມາຖວາຍເພື່ອປ່ຽນຈີວອນໄດ້ ນັບຕັ້ງແຕ່ນັ້ນເປັນຕົ້ນມາຈຶ່ງມີປະເພນີການເຮັດຈີວອນ ແລະ ຖວາຍຜ້າຈີວອນເປັນການທອດກະຖິນເກີດຂຶ້ນ.

 ອານິສົງຈາກການເຮັດບຸນທອດກະຖິນ 

ຝ່າຍສີລະວັດ ຊື່ວ່າໄດ້ຖວາຍກາລະທານແກ່ພຣະສົງ ຍ່ອມໄດ້ຮັບອານິສົງຜົນບຸນເປັນອັນຫຼາຍຈາກການຖວາຍສັງຄະທານສະເພາະການ

ຝ່າຍສົງ ພຣະພິກຂຸຜູ້ໄດ້ຮັບການກະຖິນ ແລະ ອະນຸໂມທະນາແລ້ວ ຍ່ອມໄດ້ຮັບອານິສົງຕາມພຣະວິໄນນຳ

ອານິສົງຜົນບຸນທີ່ໄດ້ຮັບຈາການທອດກະຖິນທັງສອງຝ່າຍສີລະວັດ ແລະ ຝ່າຍສົງໂດຍຫຍໍ້ຄື

1. ຈະໄດ້ເກີດມາໃນຕະກູນທີ່ດີ ມີສັມມາທິດຖິ ມີກຽດຕິຍົດ ມີຊື່ສຽງດີງາມ.

2. ຈະເກີດມາໂດຍມີຮ່າງກາຍທີ່ໄດ້ຄຸນລັກສະນະທີ່ງົດງາມສົມສ່ວນ.

3. ຈະເກີດມາມີຜິວພັນງົດງາມ ຈິດໃຈແຈ່ມໃສ ສົດຊື່ນເບີກບານ

4. ຈະເກີດມາມີຊັບສົມບັດຫຼາຍ ບໍ່ລຳບາກໃນກາສະແຫວງຫາຊັບ

5. ເປັນຜູ້ສາມາດໃຊ້ຊັບສົມບັດໃຫ້ເກີດເປັນບຸນກຸສົນຕິດຕົວໄປໃນພົບເບື້ອງໜ້າໄດ້ຢ່າງເຕັມທີ່

6. ເມື່ອລະໂລກແລ້ວ ຢ່າງຫນ້ອຍໄດ້ໄປບັງເກີດໃນສະຫວັນ

 ເປັນຫຍັງບຸນທອດກະຖິນຈຶ່ງໄດ້ອານິສົງມະຫາສານ 

ເຫດທີ່ບຸນຈາກການທອດກະຖິນເປັນບຸນທີ່ມີອານິສົງຫຼາຍເນື່ອງຈາກມີຂໍ້ຈຳກັດດ້ວຍເງື່ອນໄຂສະເພາະທີ່ຍາກ ແລະ ແຕກຕ່າງຈາກບຸນທົ່ວໄປຄື

1. ຈຳກັດການເວລາ ຄື ຕ້ອງຖວາຍພາຍໃນ 1 ເດືອນ ນັບແຕ່ມື້ອອກພັນສາເປັນຕົ້ນໄປ ຈຶ່ງເອີ້ນໄດ້ວ່າເປັນການທານ.

2. ຈຳກັດທານ ຄື ຕ້ອງຖວາຍເປັນສັງຄະທານເທົ່ານັ້ນ ຜູ້ຖວາຍຈະເຈາະຈົງຖວາຍແກ່ຮູບນັ້ນຮູບນີ້ ແບບປາຕິບຸກຄະລິກທ່ານ ຄືການຖວາຍຂອງຢ່າງອື່ນບໍ່ໄດ້

3. ຈຳກັດເທື່ອ ແຕ່ລະວັດສາມາດຮັບກະຖິນໄດ້ວັດລະ 1 ຄັ້ງເທົ່ານັ້ນ

4. ຈຳກັດຜູ້ຮັບ ຄື ພຣະຜູ້ຮັບກະຖິນໄດ້ຕ້ອງຈຳພັນສາຢູ່ວັດນັ້ນຄົບໄຕມາດບໍ່ຂາດພັນສາ ແລະ ຕ້ອງມີຈຳນວນຕັ້ງແຕ່ 5 ອົງຂຶ້ນໄປ ທັງຕ້ອງລົງຮັບພ້ອມກັນທັງໝົດ.

5. ຈຳກັດງານ ຄື ພຣະຜູ້ຮັບກະຖິນ ເມື່ອຮັບຜ້າກະຖິນມາຈາກເຈົ້າພາບແລ້ວຈະຕ້ອງເຮັດການກະຖິນໃຫ້ແລ້ວພາຍໃນມື້ນັ້ນ ຈະເລື່ອນໄປເປັນມື້ອື່ນ ຫຼື ມື້ຕໍ່ໄປບໍ່ໄດ້.

6. ຈຳກັດເຄື່ອງຖວາຍ ຄື ເຄື່ອງຖວາຍຕ້ອງເປັນຜ້າຜືນໃດຜືນໜຶ່ງໃນຈຳນວນໄຕຈີວອນເທົ່ານັ້ນ ນອກນັ້ນເປັນບໍລິວານກະຖິນທັງໝົດ

7. ກະຖິນທານ ເປັນພຸທທະປະສົງໂດຍກົງ ສ່ວນທານຢ່າງອື່ນຈະຊົງອະນຸຍາດກໍຕໍ່ເມື່ອມີ ຄົນມາທູນຂໍ ເຊັ່ນການຖວາຍຜ້າອາບນ້ຳຝົນ

8. ມີອານິສົງພິເສດ ທານຢ່າງອື່ນໄດ້ອານິສົງສະເພາະຖວາຍ ແຕ່ກະຖິນໄດ້ອານິສົງທັງທາຍົກ ແລະ ປະຕິຄາຫົກ ຄືພຣະພິກຂຸຜູ້ຮັບຖວາຍ ແລະ ອະນຸໂມທະນາກະຖິນນັ້ນ

       ນອກຈາກການທອດກະຖິນຈະເປັນບຸນທີ່ເຮັດໄດ້ຍາກແລ້ວ ຫາກຜ່ານພົ້ນຊ້ວງເວລາທີ່ກຳນົດ ວັດໃດຍັງບໍ່ໄດ້ຮັບກະຖິນ ຫຼື ເປັນວັດທີ່ມີກະຖິນຕົກຄ້າງ ຄືບໍ່ມີຄົນຈອງເປັນເຈົ້າພາບກະຖິນ ວັດນັ້ນກໍໝົດໂອກາດທອດກະຖິນໃນປີດັ່ງກ່າວ ທັງຍັງໝົດໂອກາດທີ່ຈະໄດ້ຮັບປັດໄຈເຮັດບຸນກະຖິນຈາກຍາດໂຍມເພື່ອນຳມາບຳລຸງ ສ້ອມແປງສາສະໜາສະຖານ ແລະ ພັດທະນາວັດເພື່ອການເຜີຍແຜ່ພຣະພຸດທະສາສະນະຕໍ່ໄປອີກດ້ວຍ ເພາະໃນການທອດກະຖິນແຕ່ລະຄັ້ງພຸທທະສາສະນິກກະຊົນທັງຫຼາຍຈະລວບລວມປັດໄຈເພື່ອຖວາຍເປັນບໍລິວານກະຖິນຄວບຄູ່ກັບການຖວາຍຜ້າກະຖິນເຊິ່ງເປັນອົງກະຖິນໄປພ້ອມ

 ກິດຈະກຳທອດກະຖິນທີ່ວັດພຣະທັມມະກາຍ 

ສຳລັບພິທີທອດກະຖິນສາມັກຄີ ທີ່ວັດພຣະທັມມະກາຍໃນປີນີ້ ກົງກັບວັນອາທິດທີ 6 ພະຈິກ ພ.ສ. 2565 ໃນຊ່ວງສະຖານະການບໍ່ປົກກະຕິ ພິທີທອດກະຖິນສາມັກຄີວັດພຣະທັມມະກາຍຈະມີສາທຸຊົນເດີນທາງມາຮ່ວມງານເປັນຈຳນວນຫລວງຫຼາຍ ຈາກພາຍໃນ ແລະ ຕ່າງປະເທດ ແຕ່ໃນປີນີ້ເນື່ອງດ້ວຍສະຖານນະການໂຄວິດ 19 ເຮັດໃຫ້ສາທຸຊົນບໍ່ສາມາດມາລວມຕົວກັນຈຳນວນຫຼາຍໄດ້ ທາງວັດພຣະທັມມະກາຍຈຶ່ງມີການຈັດພິທີກຳຜ່ານແອັບ ZOOM ເຊິ່ງບໍ່ວ່າຈະຢູ່ມຸມໃດໃນໂລກ ກໍສາມາດຮ່ວມງານບຸນໃຫຍ່ນີ້ໄດ້ ພຽງເປີດຈໍນ້ອມໃຈປຶ້ມປິຕິໄປກັບພິທີກຳອັນສັກສິດ ພາບຂອງທຸກຄົນທົ່ວໂລກຈະມາປາກົດລວມກັນທີ່ໜ້າຈໍຂະໜາດໃຫຍ່ ທີ່ວັດພຣະທັມມະກາຍ ປະເທດໄທ ຄືກັບພວກເຮົາທຸກຄົນໄດ້ມາຮ່ວມທອດກະຖິນສາມັກຄີ ມະຫາກາລະທານຮ່ວມກັນ ແລະ ກະແສແຫ່ງຄວາມບໍລິສຸດຂອງບຸນໃຫຍ່ນີ້ກໍ່ຈະຊ່ວຍໃຫ້ວິກິດຕ່າງໆຜ່ອນເບົາໄປໃນທາງທີ່ດີຂຶ້ນ.