ວັນອາສານຫະບູຊາ ຫມາຍເຖິງ ການບູຊາໃນວັນເພັງຂຶ້ນ 15 ຄ່ຳເດືອນ 8 ເປັນວັນການສະແດງການບູຊາແກ່ອົງສົມເດັດພຣະສັມມາສັມພຸທທະເຈົ້າ ແລະເພື່ອລະນຶກເຖິງຄຸນຂອງພຣະຣັຕຕະນະໄຕຣ

ວັນອາສານຫະບູຊາ ຖືວ່າເປັນວັນສຳຄັນວັນຫນຶ່ງທາງພຸທທະສາສະຫນາ ເພາະມີເຫດການສຳຄັນເກີດຂຶ້ນ 4 ປະການໄດ້ແກ່

1. ເປັນວັນທີ່ພຣະພຸທທະເຈົ້າໄດ້ສະແດງປະຖົມມະເທດສະຫນາ

2.ເປັນວັນທີ່ພຣະພຸທທະສາສະຫນາມີປະຖົມສາວົກ ຫຼືພຣະພຸທທະເຈົ້າໄດ້ພຣະສາວົກເປັນອົງທຳອິດ

3.ເປັນວັນທີ່ພຣະສົງອົງທຳອິດໄດ້ເກີດຂຶ້ນໃນພຣະພຸທທະສາສະຫນາ ຄື ພຣະອັນຍາໂກນທັນຍະ ແລະຍັງເປັນພຣະພິກຂຸສົງ ອົງທຳອິດທີ່ໄດ້ຮັບການອຸປະສົມບົດແບບ ເອຫິພິກຊຸອຸປະສຳປະທາ

4.ເປັນວັນທີ່ພຣະຣັຕຕະນະໄຕຣຄົບອົງສາມ ຄື ພຣະພຸທ ພຣະທັມ ພຣະສົງ

ໃນວັນນັ້ນຈຶ່ງເປັນວັນທີ່ນອກຈາກພຣະພຸທທະອົງໄດ້ປະກາດພຣະພຸທທະສາສະຫນາໃຫ້ປາກົດແກ່ຄົນທັງຫລາຍເປັນຄັ້ງທຳອິດແລ້ວ ຍັງເປັນວັນທີ່ປາກົດປະຈັກພະຍານໃນການຕັສສະຮູ້ທັມຂອງພຣະອົງເປັນຄົນທຳອິດ ວ່າທັມມະທີ່ພຣະພຸທທະອົງຕັສສະຮູ້ແລ້ວນັ້ນເປັນຂອງຈິງ ສາມາດປະຕິບັດຈົນຫລຸດພົ້ນຈາກກິເລສໄດ້ແທ້ ພາຍຫລັງຈາກທີ່ໄດ້ຟັງທັມມະເທດສະຫນາບົດທຳອິດທີ່ພຣະພຸທທະອົງໄດ້ສະແດງຈົບລົງ ຄື ບົດທັມມະຈັກກັບປະວັດຕະນະສູດ

ໃນວັນນີ້ຈຶ່ງນັບເປັນວັນທຳອິດທີ່ເປັນຈຸດເລີ້ມຕົ້ນແຫ່ງການເຜີຍແຜ່ທັມມະໃນພຣະພຸທທະສາສະຫນາໃຫ້ເປັນທີ່ຮູ້ຈັກຂອງຄົນທົ່ວໄປ

ວັນອາສານຫະບູຊາມີຕົ້ນກຳເນີດມາຕັ້ງແຕ່ໃນສະໄຫມພຸທທະການກ່າວຄື ພາຍຫລັງຈາກທີ່ເຈົ້າຊາຍສິດທັດຖະໄດ້ບັນລຸອະນຸຕະຣະສັມມາສັມໂພທິຍານ ຕັສສະຮູ້ເປັນ ພຣະສັມມາສັມພຸທທະເຈົ້າ ພຣະອົງໄດ້ໃຊ້ພຸທທະຈັກສຸກວດເບິ່ງຫມູ່ສັດ ຈຶ່ງໄດ້ຮູ້ວ່າລະດັບສະຕິປັນຍາໃນການພິດຈາລະນາທັມຂອງແຕ່ລະບຸກຄົນໃນໂລກປຽບດັ່ງຄືກັບດອກບົວ 4 ເຫຼົ່າ ຄື

1.ດອກບົວທີ່ພົ້ນນ້ຳ ບຸກຄົນຜູ້ມີປັນຍາສະຫຼຽວສະຫຼາດ ເມື່ອໄດ້ຟັງທັມກໍ່ສາມາດຮູ້ແລະເຂົ້າໃຈໄດ້ທັນທີ

2.ດອກບົວທີ່ກຳລັງຈະພົ້ນນ້ຳ ບຸກຄົນທີ່ມີສະຕິປັນຍາດີປານກາງ ເມື່ອໄດ້ຟັງທັມແລະໄດ້ຮັບການເຝິກຝົນອົບຮົມເພີ່ມເຕີມຫນ້ອຍດຽວກໍ່ສາມາດຮູ້ແລະເຂົ້າໃຈທັມມະໄດ້ໄວ

3. ດອກບົວທີ່ຢູ່ໃຕ້ນ້ຳ ບຸກຄົນທີ່ມີສະຕິປັນຍາຫນ້ອຍ ແຕ່ເປັນສັມມາທິຖິ ເມື່ອໄດ້ຟັງທັມແລ້ວແລະໄດ້ຮັບການເຝິກຝົນອົບຮົມຢູ່ຕະຫຼອດ ໂດຍໃຊ້ໄລຍະເວລາແລະຄວາມພະຍາຍາມຢ່າງຫລວງຫຼາຍ ຈຶ່ງຈະສາມາດຮູ້ແລະເຂົ້າໃຈທັມມະໄດ້

4.ດອກບົວທີ່ຈົມຢູ່ໃຕ້ຂີ້ຕົມ ບຸກຄົນທີ່ບໍ່ມີສະຕິປັນຍາ ເປັນມິດສາທິຖິ ເຖິງວ່າຈະໄດ້ຟັງຫຼືໄດ້ງິນທັມມະກໍ່ບໍ່ສາມາດເຂົ້າໃຈໄດ້ເລີຍ

ດ້ວຍມະຫາກາລຸນາທິຄຸນ ພຣະພຸທທະອົງຈຶ່ງໄດ້ລະນຶກເຖິງປັນຈະວັກຄີ ຄືໂກນທັນຍະ ວັບປະ ພັດທິຍະ ມະຫານາມະ ແລະອັດສະຊິ ທີ່ເຄີຍເບິ່ງແຍງອຸປັດຖາກ

ພຣະທະອົງຄັ້ງທີ່ຍັງເປັນພຣະໂພທິສັດບຳເພັນພຽນທຸກກະລະກິຣິຍາ ພຣະອົງຈຶ່ງສະເດັດໄປໂຜດປັນຈັກວັກຄີ ທີ່ປ່າອິສິປະຕະນະມະລຶຄະທາຍາວັນ ເມື່ອພຣະພຸທທະອົງໄດ້ເຊົາລັງເລສົງໄສ ແລະທິຖິຂອງປັນຈະວັກຄີທັງ 5 ລົງໄດ້ ແລະໄດ້ເຫັນວ່າ ບັດນີ້ທ່ານ

ປັນຈະວັກຄີທັງ 5 ພ້ອມຮັບຟັງທັມຈາກພຣະພຸທທະອົງແລ້ວ ຈຶ່ງໄດ້ສະແດງປະຖົມມະເທດສະຫນາ ຄື ທັມມະຈັກກັບປະວັດຕະນະສູດໃນຂະນະທີ່ພຣະພຸທທະອົງໄດ້ສະແດງທັມຢູ່ນັ້ນ

ທ່ານໂກນທັນຍະໄດ້ພິດຈາລະນາທັມໄປຕາມລຳດັບ ຈົນເມື່ອພຣະທັມມະເທດສະຫນາໄດ້ຈົບລົງແລ້ວ ທ່ານກໍໍ່ໄດ້ດວງຕາເຫັນທັມ (ບັນລຸໂສດາປັດຕິຜົນ) ເປັນຄົນທຳອິດ ດ້ວຍເຫດການດັ່ງກ່າວນີ້ເອງ ຈຶ່ງເຮັດໃຫ້ພຣະພຸທທະສາສະຫນາ ມີພຣະຣັຕຕະນໄຕຼ ຄົບອົງ 3 ປະການຄື ພຸທທະຣັຕຕະນະ ທັມມະຣັຕຕະນະ ສັງຄະຣັຕຕະນະ

ທັມມະຈັກກັບປະວັດຕະນະສູດ ເປັນປະຖົມມະເທດສະຫນາ ຫຼືພຣະທັມມະເທດສະຫນາບົດທຳອິດຂອງພຣະພຸທທະອົງທີ່ໄດ້ສະແດງແກ່ປັນຈະວັກຄີທັງ 5 ພາຍຫລັງຈາກທີ່ໄດ້ຕັສສະຮູ້ເປັນພຣະສັມມາສັມພຸທທະເຈົ້າແລ້ວ ທັມມະຈັກກັບປະວັດຕະນະສູດ ຄື ພຣະທັມທີ່ວ່າດ້ວຍເລື່ອງການຫມຸນກົງລໍ້ແຫ່ງທັມໃຫ້ເຄື່ອນໄປປຽບຄືກັບທັມມະລາດຊະຣົດ ທີ່ພຣະສັມມາສັມພຸທທະເຈົ້າໄດ້ປາດຖະຫນາຈະໃຊ້ບັນທຸກຫຼືຂົນເວໄນຍະສັດທັງຫລາຍອອກຈາກສັງສາລະວັດໄປສູ່ດິນແດນທີ່ກະເສມຄືນິບພານ ໂດຍມີພຣະພຸທທະອົງເປັນສາລະຖີ

ສາລະສຳຄັນຂອງບົດທັມມະຈັກກັບປະວັດຕະນະສູດ ວ່າດ້ວຍຂໍ້ປະຕິບັດທີ່ບຸກຄົນ ບໍ່ພຶງກະທຳ 2 ປະການຄື

1.ບໍ່ປ່ອຍຕົວປ່ອຍໃຈໃຫ້ສະແຫວງຫາຫຼືຍຶດຕິດກັບຄວາມສຸກທີ່ເກີດຈາກກາມມະຄຸນທັງ 5 ຫລາຍເກີນໄປ (ກາມມະສຸຂັນຣິການຸໂຍກ)

2.ບໍ່ໃຫ້ສ້າງຄວາມເດືອດຮ້ອນຄວາມລຳບາກໃຫ້ແກ່ຕົນເອງທັງຮ່າງກາຍແລະຈິດໃຈທີ່ເປັນການທໍລະມານຕົນເອງໂດຍຫາປະໂຫຍດບໍ່ໄດ້ (ອັດຕະກິລະມະຖານຸໂຍກ )

ເພາະການປະຕິບັດຕົນດັ່ງກ່າວທັງ 2ປະການ ເປັນຕົ້ນເຫດແຫ່ງທຸກ ແລະບໍ່ແມ່ນຫົນທາງທີ່ຈະນຳໄປສູ່ຄວາມສຸກທີ່ແທ້ຈິງແບບທີ່ໃຈປາດຖະຫນາ ແຕ່ໃຫ້ປະຕິບັດຕາມທາງສາຍກາງ ຄື ມັດຊິມາປະຕິປະທາ ເຊິ່ງເປັນຂໍ້ປະຕິບັດທີ່ເປັນໄປເພື່ອຄວາມສະຫງົບສະຫງັດຂອງຈິດໃຈ ແລະເປັນຫົນທາງທີ່ຈະນຳໄປສູ່ການດັບກິເລສຕັນຫາ ເຊິ່ງເປັນບໍ່ເກີດແຫ່ງທຸກໄດ້ຢ່າງແທ້ຈິງ

ມັດຊິມາປະຕິປະທາ ເປັນການປະຕິບັດຕາມຫລັກແປດປະການຄື

ມັກມີອົງແປດອັນໄດ້ແກ່

1.ສັມມາທິດຖິ ເຫັນຊອບ ຄື ຮູ້ເຂົ້າໃຈຖືກຕ້ອງ ເຫັນຕາມເປັນຈິງ

2.ສັມມາສັງກັບປະ ດຳຣິຊອບ ຄື ຄິດສຸດຈະລິດຕັ້ງໃຈເຮັດສິ່ງທີ່ດີງາມ

3.ສັມມາວາຈາ ເຈລະຈາຊອບ ຄື ກ່າວຄຳສຸດຈະລິດ

4.ສັມມາກັມມັນຕະ ກະທຳຊອບ ຄືທຳການສຸດຈະລິດ

5.ສັມມາອາຊີວະ ອາຊີບຊອບຄືປະກອບສັມມາອາຊີບຫລືອາຊີບສຸດຈະລິດ

6.ສັມມາວາຍາມະ ພະຍາຍາມຊອບ ຄື ພຽນລະຊົ່ວບຳເພັນດີ

7.ສັມມາສະຕິ ລະນຶກຊອບ ຄື ທຳການດ້ວຍຈິດສຳນຶກສະເຫມີ ບໍ່ເຜີພາດ

8. ສັມມາສະມາທິ ຕັ້ງຈິດຫມັ້ນຊອບ ຄືຄຸມຈິດໃຫ້ແນ່ວແນ່ຫມັ້ນຄົງ

 ດັ່ງນັ້ນການປະຕິບັດຕົນຕາມຫລັກມັກມີອົງ 8 ຈຶ່ງເປັນການປະຕິບັດທີ່ນຳໄປສູ່ການຮູ້ແຈ້ງ ໃນອະຣິຍະສັດ 4 ຄື

       1.ທຸກຄືທຸກ

       2.ສຸມຸໄທ ຄືເຫດທີ່ເຮັດໃຫ້ເກີດທຸກ

       3.ນິໂລດ ຄື ຄວາມດັບທຸກ

       4.ມັກ ຄື ຂໍ້ປະຕິບັດໃຫ້ເຖິງຄວາມດັບທຸກຢ່າງແທ້ຈິງ (ມັກມີອົງແປດ)

ຫລັງຈາກທີ່ພຣະສັມມາສັມພຸທທະເຈົ້າ ໄດ້ຕັສທັມມະເທດສະຫນາ ທັມມະຈັກກັບປະວັດຕະນະສູດ ແກ່ປັນຈະວັກຄີພິກຂຸທັງ 5 ເປັນປະຖົມມະເທດສະຫນາແລ້ວ ພຣະອົງບໍ່ໄດ້ຕັສສະແດງພຣະສູດນີ້ແກ່ໃຜອີກເລີຍ ພຣະສູດທີ່ພຣະພຸທທະອົງໄດ້ຕັສເທດສະຫນາຕະຫລອດໄລຍະເວລາ 45 ພັນສາ ແຫ່ງການເຜີຍແຜ່ ພຣະພຸທທະສາສະຫນານັ້ນລ້ວນແຕ່ໄດ້ສະແດງທັມມະກະຖາເພື່ອຂະຫຍາຍຄວາມແຕ່ລະຫມວດຫົວຂໍ້ທັມທີ່ປາກົດໃນທັມມະຈັກກັບປະວັດຕະນະສູດ ຫລືປະຖົມມະເທດສະຫນາທັ້ງຫມົດ

ພຣະພຸທ

ພຣະອົງໄດ້ຄົ້ນພົບຄວາມຈິງອັນປະເສີດນີ້ດ້ວຍຕົວພຣະອົງເອງ ແລະໄດ້ນຳຄຳສັ່ງສອນບອກກ່າວແກ່ຊາວໂລກ ຫາກພຣະພຸທທະອົງບໍ່ມາບັງເກີດກໍ່ຈະບໍ່ມີຜູ້ໃດຮູ້ເລື່ອງບຸນບາບແລະການວຽນຕາຍວຽນເກີດໃນສັງສາລະວັດ ຊາວໂລກກໍ່ຈະດຳເນີນຊີວິດດ້ວຍຄວາມປະຫມາດເປັນເຫດໃຫ້ໄປສູ່ອະບາຍຍະພູມໄດ້ງ່າຍ

ດ້ວຍເຫດດັ່ງນີ້ເອງ ການເກີດຂຶ້ນຂອງພຣະສັມມາສັມພຸທທະເຈົ້າຈຶ່ງປຽບດັ່ງແສງສະຫວ່າງທີ່ຍິ່ງກວ່າແສງສະຫວ່າງໃດໆ ໃນໂລກ ເພາະເປັນແສງສະຫວ່າງທີ່ນຳໄປສູ່ຫົນທາງແຫ່ງການພົ້ນທຸກແລະການຫລຸດພົ້ນຈາກການວຽນຕາຍວຽນເກີດໃນວັດຕະສົງສານ

ພຣະທັມ

ໂລກນີ້ເຕັມໄປດ້ວຍຄວາມທຸກແລະການວຽນຕາຍວຽນເກີດແບບຫາທີ່ສຸດບໍ່ໄດ້ ເປັນຄວາມຈິງທີ່ທຸກຊີວິດຕ້ອງພໍ້ບໍ່ວ່າຈະຍິນຍອມຫລືບໍ່ກໍ່ຕາມ ທັມມະຂອງພຣະພຸທທະອົງຈຶ່ງມີເນື້ອຫາທີ່ກ່ຽວກັບສາເຫດແຫ່ງທຸກ ແລະວິທີການດັບທຸກ ນັ້ນຄື ອີຣິຍະສັດສີ່ ເຊິ່ງຫາກໃຜນຳໄປປະຕິບັດຕາມຈະສາມາດເຮັດໃຫ້ພົ້ນທຸກໄດ້

ທັມມະຂອງພຣະສັມມາສັມພຸທທະເຈົ້າຈຶ່ງມີຫລາກຫລາຍຫົວຂໍ້ທັມມະ ເລິກໄປຕາມລຳດັບຕັ້ງແຕ່ແນວທາງປະຕິດບັດເພື່ອການດຳເນີນຊີວິດທີ່ຖືກຕ້ອງດີງາມ ຈົນໄປຮອດການປະຕິບັດເພື່ອການຫລຸດພົ້ນຈາກກິເລສອາດສະວະແລະການວຽນວ່າຍຕາຍເກີດ ດັ່ງນັ້ນຜູ້ທີ່ຕ້ອງການສະແຫວງຫາທາງຫລຸດພົ້ນຈາກກິເລສ ກໍ່ສາມາດເລືອກຫົວຂໍ້ທັມເພື່ອນຳໄປປະຕິບັດໄດ້ຕາມຄວາມເຫມາະສົມແກ່ສະຖານະພາບຂອງຕົນ

ພຣະສົງ

ພຣະພິກຂຸສົງ ຄືພຣະສາວົກຂອງພຣະສັມມາສັມພຸທທະເຈົ້າ ເປັນຜູ້ທີ່ເສຍສະຫລະຊີວິດທາງໂລກເຂົ້າສູ່ຮົ່ມກາສາວະພັດ ໂດຍຍຶດຖືຂໍ້ວັດປະຕິບັດທີ່ພຣະພຸທທະອົງສັ່ງສອນເພື່ອມຸ່ງສູ່ການຫລຸດພົ້ນຈາກກິເລສອາດສະວະ

ນັບຕັ້ງແຕ່ສະໄຫມພຸທທະການພາຍຫລັງຈາກທີ່ພຣະພຸທທະອົງປະກາດພຸທທະສາສະຫນາແລ້ວ ນອກຈາກພຣະອົງຈະສະເດັດຈາລິກເພື່ອເຮັດຫນ້າທີ່ເຜີຍແຜ່ພຣະທັມຄຳສອນດ້ວຍພຣະອົງເອງ ພຣະອົງຍັງໄດ້ສົ່ງພຸທທະສາວົກອອກໄປເຮັດຫນ້າທີ່ເຜີຍແຜ່ພຸທທະສາສະຫນາ ເຮັດໃຫ້ພຣະພຸທທະສາສະຫນາມີຄວາມຈະເລີນຮຸ່ງເຮືອງແລະແຜ່ຂະຫຍາຍໄປແບບກວ້າງຂວາງ ຜູ້ຄົນເປັນຈຳນວນຫລວງຫລາຍພາກັນຖິ້ມລັດທິເກົ່າດັ້ງເດີມຫັນມານັບຖືເລື້ອມໃສສັດທາໃນພຣະພຸທທະສາສະຫນາຫລາຍຂຶ້ນ

ເຖິງແມ່ນວ່າພຣະພຸທທະອົງຈະສະເດັດດັບຂັນປະລິນິບພານດົນນານແລ້ວ ແຕ່ພຣະພິກຂຸສົງກໍ່ຍັງຄົງທຳຫນ້າທີ່ເທດສອນທັມມະແລະເປັນຄູສອນສີລທັມ ສອນຫລັກໃນການດຳເນີນຊີວິດຢ່າງມີຄວາມສຸກ ໃຫ້ແກ່ຄົນທົ່ວໄປໂດຍຕະຫລອດ

ພຣະພຸທທະສາສະຫນາເປັນສາສະຫນາແຫ່ງສັນຕິພາບທີ່ໃຊ້ທັມມະເປັນຫລັກໃນການດຳເນີນຊີວິດ ຄຳສອນສ່ວນໃຫຍ່ຈຶ່ງມີເປົ້າຫມາຍໄປໃນການປະຕິບັດເພື່ອໃຫ້ມີໃຈສະຫງົບ ບໍ່ມັກການໃຊ້ຄວາມຮຸນແຮງໄປຈົນຮອດການເຜີຍແຜ່ຄຳສອນກໍ່ບໍ່ໄດ້ບັງຄັບໃຫ້ໃຜເຊື່ອ ແຕ່ມຸ່ງໃຫ້ບຸກຄົນພິດຈາລະນາກັ່ນກອງຫາເຫດຜົນ ແລະເຂົ້າມາພິສູດດ້ວຍການລົງມືປະຕິບັດດ້ວຍຕົນເອງ

ດັ່ງນັ້ນຫາກມະນຸດທຸກຄົນປະຕິບັດຕາມຄຳສອນຂອງພຣະພຸທທະອົງໄປຈົນວ່າກິເລສທີ່ເກາະກ່ຽວຈິດໃຈເລີ້ມເບົາບາງລົງ ເມື່ອນັ້ນ ຄວາມໂລບ ໂກດ ຫລົງ ຄວາມເຫັນແກ່ຕົວຍ່ອມຫລຸດລົງມາຕາມລຳດັບ ຄວາມມີເມດຕາແລະປາດຖະຫນາດີຕໍ່ກັນຍ່ອມບັງເກີດຂຶ້ນແທນທີ່ ຫາກທຸກຄົນໃນໂລກເຮັດໄດ້ແບບນີ້ ສັນຕິພາບຍ່ອມບັເກີດຂຶ້ນຢ່າງແນ່ນອນ

ຈະເຫັນໄດ້ວ່າຄຳສອນຂອງພຣະພຸທທະອົງມີຄຸນຄ່າແລະຄວາມສຳຄັນປານໃດ ດັ່ງນັ້ນໃນວັນອາສານຫະບູຊານີ້ ເຮົາຈະມາລະນຶກເຖິງເຫດການເມື່ອຄັ້ງພຣະພຸທທະອົງໄດ້ຕັສສະແດງທັມເປັນຄັ້ງທຳອິດໃນມື້ນັ້ນ ແລະນັ່ງສະມາທິແຜ່ເມຕຕາ ເພື່ອໃຫ້ເກີດສັນຕິສຸກໄປທົ່ວໂລກພ້ອມໆກັນ

ໃນວັນອາສານຫະບູຊາ ເປັນວັນທີ່ເຫລົ່າພຸທທະບໍລິສັດທັງສີ່ ໄດ້ພ້ອມໃຈກັນເຂົ້າວັດຟັງທັມ ແລະປະກອບພິທີກຳທາງສາສະຫນາທີ່ທາງວັດຈັດຂຶ້ນ ເພື່ອນ້ອມຖວາຍເປັນພຸທທະບູຊາ ແດ່ອົງສົມເດັດພຣະສັມມາສັມພຸທທະເຈົ້າ ດ້ວຍອາມິດບູຊາ ແລະປະຕິບັດບູຊາ ພ້ອມລະນຶກເຖິງຄຸນພຣະຮັດຕະນະໄຕຣທີ່ບໍ່ມີປະມານ

ໃນມື້ນີ້ຄະນະສົງທັງໃນປະເທດແລະຕ່າງປະເທດທົ່ວທຸກນິກາຍຈຳນວນ 10000 ກວ່າອົງ ຕ່າງກໍ່ມີຄວາມພ້ອມໃຈກັນມາຮ່ວມປະກອບພິທີຈະເລີນພຸທທະມົນ ປະຕິບັດສະມາທິພາວະນາ ແລະແຜ່ເມດຕາໃນເວລາດຽວກັນ ເພື່ອໃຫ້ໂລກນີ້ເກີດຄວາມສະຫງົບສຸກ ຮົ່ມເຢັນປາສະຈາກການບຽດບຽນລ້າງຜານຊີວິດທີ່ບໍລິສຸດດ້ວຍປະການທັງປວງ ນອກຈາກເຮົາຈະໄດ້ນ້ອມຖວາຍເປັນພຸທທະບູຊາແລ້ວ ຍັງເປັນການເພີ່ມພູນບຸນກຸສົນໃຫ້ແກ່ຕົນເອງ ອີກທັງຍັງສາມາດອຸທິດບຸນໄປໃຫ້ແກ່ຫມູ່ຍາດ ທີ່ລ່ວງຫລັບໄປແລ້ວອີກດ້ວຍ

ດັ່ງນັ້ນເມື່ອເຫລົ່າພຸທທະບໍລິສັດສີ່ ທົ່ວໂລກພ້ອມໃຈມາຮ່ວມສູດມົນ ຈະເລີນສະມາທິ ແລະແຜ່ເມດຕາໃນຊ່ວງເວລາດຽວກັນດ້ວຍໃຈບໍລິສຸດໂດຍການຢຸດໃຈໄວ້ທີ່ສູນກາງກາຍຖານທີເຈັດເຊິ່ງເປັນຈຸດທີ່ເຮັດໃຫ້ໃຈມີພະລັງຫລາຍທີ່ສຸດ ຍ່ອມກໍ່ໃຫ້ເກີດກະແສບຸນທີ່ບໍລິສຸດມາຮ່ວມຕົວກັນເປັນດວງບຸນອັນຍິ່ງໃຫຍ່ ເຊິ່ງດວງບຸນນີ້ມີອານຸພາບຫລວງຫລາຍແບບບໍ່ມີປະມານສາມາດປ່ຽນເຫດການທີ່ບໍ່ດີຕ່າງໆ ໃຫ້ກາຍເປັນດີໄດ້

ອີກທັງພາບແຫ່ງບຸນນີ້ຈະດົນໃຈໃຫ້ແກ່ຜູ້ທີ່ພົບເຫັນເກີດຄວາມສັດທາ ແລະເກີດແຮງບັນດານໃຈໃຫ້ຢາກເຂົ້າມາສຶກສາພຣະພຸທທະສາສະຫນາ ເຊິ່ງຫາກພາບເຫລົ່ານີ້ຖືກກະຈາຍອອກໄປສູ່ສາຍຕາຍຂອງຜູ້ຄົນທົ່ວທຸກມຸມໂລກຈົນສາມາດສ້າງຄວາມສັດທາໃຫ້ເກີດແກ່ຜູ້ຄົນເຫລົ່ານັ້ນຈົນມາຮ່ວມປະຕິບັດສະມາທິຮ່ວມກັນ ຫາກເປັນແບບນີ້ສັນຕິສຸກຄືຄວາມສະຫງົບສຸກຂອງໃຈທີ່ເກີດພາຍໃນຕົນເອງຍ່ອມກໍ່ໃຫ້ເກີດສັນຕິພາບພາຍນອກ ຄືສັນຕິພາບໂລກໄດ້ຢ່າງແນ່ນອນ

ດັ່ງນັ້ນຈຶ່ງຂໍເຊີນຊວນພຸທທະສາສະນິກກະຊົນທຸກຄົນທົ່ວໂລກມາຮ່ວມເປັນສ່ວນຫນຶ່ງໃນການສ້າງສັນຕິພາບໃຫ້ເກີດຂຶ້ນໃນໂລກຫນ່ວຍນີ້ ດ້ວຍການຮ່ວມກິດຈະກຳຜ່ານ zoom ໃນເວລາດຽວກັນຕາມກຳນົດການດັ່ງກ່າວ

ວັນອາສາລະຫະບູຊາ

ຮ່ວມຈຸດປະທີບ ແລະນັ່ງສະມາທິພ້ອມກັນທົ່ວໂລກ

ວັນພຸດ ທີ 13 ກໍລະກົດ  2565

ທີ່ວັດພຣະທັມມະກາຍ

ກຳນົດການ

———————–

19:00ນ.ຈຸດປະທີບໂຄມເອກບູຊາພຣະຣັຕຕະນະໄຕຣ/ກ່າວຄຳຖວາຍປະທີບເປັນພຸທທະບູຊາ

19.30ນ.ຄະນະສົງທົ່ວໂລກຈະເລີນພຸທທະມົນຜ່ານ ZOOM /ນັ່ງສະມາທິປະຕິບັດທັມ

20:50ນ.ອະທິຖານຈິດ /ແຜ່ເມດຕາ

21:00ນ.ແລ້ວພິທີ

———————–

ພິທີສະຫຼອງໄຊສູດມົນບົດທັມມະຈັກ 4,555,555,555ຈົບ